功夫茶:唔係打劫就斬人 香江治安亂象多

2023年03月26日 00:03
東網電視
更多新聞短片
風聲雨聲,夾雜雷暴閃電冰雹,天然製造月黑風高犯罪夜環境,又係南亞刀匪食大茶飯好時機!呢,尋日下晝約3點35分,4名南亞裔男子持刀闖入尖沙咀彌敦道一個購物商場嘅樓上錶行,掠走一批手錶後,繼而乘坐接應私家車往新界方向逃去。店員驚魂甫定,隨即報案求助。
大批執法人員接報趕至,翻查閉路電視並立即於各個主要路口設置路障追捕,消息指匪徒劫走46隻,共值逾1,000萬元嘅名錶及約3萬元現金。4名南亞劫匪均穿上黃色間條反光衣,分別戴黑色及藍色口罩,其中兩人更戴上地盤安全帽,另外兩人則戴黑色帽,4人頭髮均被遮蓋,顯示佢哋喬裝成地盤工人犯案。匪徒亦劫走職員一部手機,調查人員追蹤手機信號,最後顯示位置為港鐵九龍站附近嘅漾日居。
打劫錶行其實時有所聞。上年8月尾銅鑼灣駱克道謝氏錶行被4名賊人闖入打劫,掠走70隻名錶,總值約1,300萬元,匪徒之後登上私家車逃去。執法人員經調查後,幾日後拘捕6男,包括4名打劫嘅賊人,並起回36隻失錶及檢獲約23萬元現鈔,相信啲現鈔都係來自犯罪得益。今趟尖沙咀單劫錶案,主角換上南亞匪幫,希望都能夠盡早破案!
各位,喺遭受黑暴漫長嘅折磨後,港人無不盼望社會恢復秩序,之不過事與願違,睇吓港聞版,唔係打劫就係斬人,再唔係就係縱火!講真,罪惡從未遠離我城,反而係無日無之嘅南亞匪幫、假難民、黑幫嘅械鬥劈友,掃之不盡嘅毒品、走私案,仲有數不清嘅詐騙等,甚至連執法者都知法犯法,18區皆無淨土,治安崩壞人人憂!你話香港如何可以開心起來?
嗱!尋日朝早10時多,上水發生斬人案。話說34歲姓林男子與28歲姓楊女友,駕乘私家車抵達天平路奕翠園停車場對開,林男落車擬往取回另一輛貨車,突然一輛私家車急速駛至,3名歹徒從車上跳下揮刀向事主手腳狂斬,佢猝不及防中刀浴血;歹徒年約20至30歲,均穿黑衫黑褲及戴口罩,逞兇後登上私家車揚長而去。據了解,林男有黑幫背景,早前已「過底」另一幫派,不排除因而被報復斬傷。
呢,點知話口未完,同日下午4時多,油麻地又發生一名男子被數名本地男子挾持擄上私家車事件,事主大喊救命驚動途人報警,執法人員趕至,可惜歹徒已逃去,都咪話唔猖狂。
香港治安亂象多籮籮,仲要鑊鑊新鮮鑊鑊甘!在上嘅再唔想方設法撥亂反正,硬要唱好香港,恐怕只會適得其反!