功夫茶:人間妖域又失控 酒樽亂飛醉動武

2023年04月02日 00:04
東網電視
更多新聞短片
一提起中環蘭桂坊呢個「人間妖域」,都唔慌有乜好嘢!蘭桂坊又被稱為「國際蒲點」,燈紅酒綠背後,迷亂醉娃通處走、少數族裔惡勢力盤據,加上假難民、南亞匪幫,各種亂象成為黃賭毒等罪案嘅觸發點。事實係執法人員久不久就會喺「人間妖域」進行煞有介事嘅「掃妖行動」,所謂「犁庭掃穴」都係大樹林中一塊葉,有你唔多冇你唔少,「人間妖域」依然癲癲哋,唔知死!
呢嗱!「人間妖域」又出事,又再發生暴力事件。事發喺中環德己立街55號一酒吧,場內有酒客疑因故爭執,繼而呼朋喚友「開拖」,眾人帶醉動武,場面迅即失控,其餘酒客慌忙走避。
從現場拍攝片段可見,場面極度混亂!七彩繽紛閃燈夾着喧鬧人聲,叫囂聲中不乏粗口、酒樽橫飛,更有人懷疑手持酒樽作勢施襲,真係「一樽飛出眼火,對面睇見牙煙」!片中疑有酒吧職員透過咪高峰呼籲在場人士冷靜,去到呢個「劍拔弩張」嘅失控階段,邊有咁易控制到場面吖!執法人員到場,隨即打開場內燈光,並着不相干人士離場。現場所見,一地酒水、玻璃碎,一片狼藉,恍如置身古戰場!
執法部門指尋日凌晨接獲報案,稱上址酒吧內有人打交,人員到場後發現3名男傷者,當中包括兩名分別姓余23歲及姓黃25歲本地人,以及一名28歲波蘭籍男子,3人額頭受傷,異口同聲稱互不認識,事件原委有待了解,案件列作「襲擊致造成實際身體傷害」,暫未有人被捕。
講真,今次酒吧失控事件,只傷及3人且只係小傷,並無上演「小李飛刀」,算係不幸中之大幸!之但係,從現場所見,當時亦有人推人之場面,雞飛狗走下,有人躀低亦不足為奇,若然出現人踩人,則事件可大可小。蘭桂坊不是沒有前科,1993年1月1日元旦發生嘅一宗人踩人事故,一提起令人猶有餘悸。當晚蘭桂坊有大批群眾參加跨年音樂會及新年慶祝活動,喺跨年倒數後便樂極生悲,人潮喺德己立街推擠及有人跌倒引起人踩人,釀成21人死亡及63人受傷,成為香港開埠以來最嚴重人踩人慘劇。
各位,功夫茶將30年前嘅慘劇攞出來講,並非無的放矢。皆因今次酒吧場面混亂,從片段可見,有一名赤膊男子倒地、地上遺下一攤血漬,最明顯係在場人士互相推撞,當時探射燈光影迷離,在場人士肯定又飲到high high哋,唔知是否因溝女或眼睥睥唔順超因而發生爭執,若有人被推倒而產生骨牌效應,咁就大大劑,說不定又造成踩死人事件!香港正步入凶年,滿城盡見血與腥,欲保出入平安,切記遠離人間妖域!