娛圈單打:四奶奶合體無期 剩番柴九掂唔掂
2023年09月30日 00:03
東網電視
更多新聞短片
TVB經典劇集《巾幗梟雄》造就黎耀祥、鄧萃雯一登視帝視后寶座,同時令劇中多名演員走紅,續集一樣有好成績。事隔十多年,《巾幗梟雄4》終於開拍,男主角繼續是黎耀祥,惟女主角由鄧萃雯變成胡定欣。儘管大家都是好戲之人,但物是人非,觀眾當然大感失望!
一直有傳雯女因為在內地走紅,身價急升,跟娘家傾不攏價錢,拉鋸數年最終被飛出局。雯女為正視聽,日前發長文揚言「我比觀眾的失望更大!」強調並不看重酬勞,「已等候四年給出了三次檔期」,暗示娘家無誠意。唉,四奶奶和柴九合體無期,即使拍出嚟都唔係嗰回事啦。君不見,《巾幗3》改由黎耀祥夥拍胡杏兒,收視口碑慘不忍睹,更被網民推舉為年度爛劇。無他,胡杏兒的演技根本不在同一檔次,當年《金枝慾孽》如妃一角,雯女已盡顯功架,《巾幗》的成功,她肯定係頭號功臣。如果黎耀祥、鄧萃雯能夠再續前緣,肯定係收視保證。
何況祥仔近年主演的電視劇都未能造成話題,收視一般,今次得番佢獨挑大樑,收視能否再創佳績,真係要睇過至知。至於胡定欣,雖然在《巾幗》已做祥仔老婆海棠,但論霸氣,始終跟四奶奶有大段距離。
不過又得承認,現實是殘酷的,年齡是女人大敵。雯女已經57歲,近期在內地出席活動,已被彈發福兼有老態,再演四奶奶,隨時只會令人慨嘆風采不再。講真,TVB係時候放膽讓更多年輕演員披掛上陣,來來去去「四十路」、「五十路」,舊劇拍完又拍,畀人踩係老人台,豈是無因!