娛圈單打:靚仔偏偏甩頭髮 男人最痛算這種
2023年11月26日 00:03
東網電視
更多新聞短片
「點解我生得咁靚仔,但係要甩頭髮?」《少林足球》二師兄的經典大哉問,活生生發生在一枚大靚仔身上,慘!憑《延禧攻略》上位的內地靚仔小生許凱,行年只有28歲非常後生,偏偏因為脫髮而需要植髮,仲話不排除再甩再植。哎唷,男人最痛算這種!
許凱新劇開播,最近頻頻偕女主角景甜一齊做宣傳,意想不到的是,這位靚仔知無不言、言無不實,竟然自揭早已植髮,仲話脫髮若沒有好轉,一於繼續植植植!嘩,咁坦白,得唔得㗎?
嗱,許凱話喎,因為拍得太多古裝劇,必須長期戴頭套,既要用酒精膠水黏貼,拆頭套亦要用酒精棉,而且係90多度的純酒精!咁搞法,唔甩皮甩毛就有鬼咯!他坦言因此皮膚刺痛,陰功豬!最慘就係髮際線不斷上移,故此「接受現實」植髮去,連景甜都忍唔住大讚他夠晒坦白。
即係咁,明星植髮早就唔係新聞,尤其現今醫學昌明,植髮同真髮完全冇分別,為咗搵食,為咗靚靚,梗係早植早享受。之但係,寧畀人知,莫畀人見,好多植髮男星植完都唔會出聲,大家心照就算,邊似得許凱咁直言不諱吖。
講起呢位靚仔,《延》劇之後都冇乜佳作,實在可惜。有內地網民將他與南韓「臉蛋天才」車銀優相提並論,可見其外在條件相當出眾,不過唔知係咪曾發生家暴女友醜聞,影響人氣。當時面對海量批評,許凱不脫直白本色,自認過去是個「壞男生」,承諾日後會成為一個好男人。話時話,許凱在深圳出生,廣東話非常流利,不如來港發展,話唔定有好成績!