娱圈单打：未能进军内地　红不过罗湖桥？

“Loong 9”成团以来有唔少争议，咪以为一切已经尘埃落定，官方忽然宣布增加3名成员，包括“洪欣仔”张镐濂、郭殿甲、陈鑫昊，并分两组进行活动，分别是“Loong 9-S”及“Loong 9-V”。S队专攻内地市场，V队则立足香港，外界均认为V队唔及S队重要！

睇吓成员名单，奥利、李权哲、江信熹、梁诗煜、白子奕、陈梁均在两队名单之中，换言之中港两边走，最得宠系佢哋！新增3子亦被拨入S队；反观香港代表“妙音龙子”冼靖峰、文佐匡、黄奕斌，全部拨入V队，即系留港发展。难怪网民揶揄，佢哋唔止红不过罗湖桥，直情只能留在TVB厂内活动！

嗱，洪欣个仔张镐濂大热倒灶，在决赛当晚未能成团，佢坦言好唔开心，曾经为此哭咗出来！家阵突发式加入团队，仲要系被睇高一线的S队，应该可以笑番晒啦！不过又有网民认为不公平，唔知3子因何被选中，质疑系咪靠人事关系！哈哈，顺得哥情失嫂意，就算张镐濂外在条件几优秀都好，始终难以讨好全世界。

讲番香港的“妙音龙子”冼靖峰，家阵冇份闯大陆市场，唔知佢会唔会失望呢？其实都唔怕嘅，做好香港市场先至进军内地都未迟！起码跻身“Loong 9”成功打开知名度，加上唱功唔错，应可继续发围。

讲开又讲，冼靖峰原来系“喇沙仔”，其后升读港大工商管理学系，绝对系高材生！大家都知佢参加《声梦传奇》出道，却原来之前亦曾参加隔篱台《全民造星II》，几经转折，最后却凭《亚洲超星团》上位！