娱圈单打：老公唔生性　老婆梗系㷫

唉，有个唔生性的老公，真系人生惨事！台湾名嘴黄子佼去年卷入#MeToo风暴，虽然最终不被起诉，但当局调查发现，佼佼竟然系色情网站高级会员，曾购买7部少女被偷拍的性爱影片，违反《儿少性剥削防制条例》！日前甚至被爆在#MeToo事发后，依然继续买买买！丑闻爆个不停，佢老婆就认真惨情，搞到冇面见人呀阴功！

太太孟耿如同为艺人，仲比佼佼年轻廿岁，在老公身败名裂后依然不离不弃，非常难得。本来佢已逐步恢复演艺活动，原定呢两日帮家人开设的甜品柜现身宣传，殊不知老公唔生性，淫贱不能移，搞到佢都唔敢蒲头，发文指“计划赶不上变化”，宣传活动暂时取消。

老公搞事，老婆当灾，真系难为了佳人！之不过，唔知系咪咁啱得咁跷，就在老公新一波性丑闻闹得不可开交之际，台媒又曝光了孟耿如在台湾大地震期间，于家中飞身保护爱女的惊险一幕，获网民大赞母爱伟大，似乎成功扳回舆论失地！所以话啫，男人娶到个好老婆，闯咗祸都冇咁伤！

咁又系呀，孟耿如真系称得上绝世好老婆。去年老公搞出呢坛杰挞挞的世纪苏州屎，身为老婆当然面目无光，就算唔离婚，感情一定会大受影响。孟耿如却选择宽恕，仲讲明会同老公共同进退，扬言“会一起弥补曾经犯过的错误”，绝非人人做得到。

孟耿如本身都系知名演员，今年更会参演《我们与恶的距离2》，老公的性丑闻搞到佢停工大半年，家阵先至逐步复出，可惜佼佼唔生性，衰嘢长爆长有，唔知呢位贤内助仲顶得几耐呢？