娱圈单打：畀钱同港姐私聊　有冇下文惹遐想

前港姐冠军杨思琦自从向鼎爷个仔李泳豪派帽后，由人见人爱甜姐儿，变成水性杨花劈腿女，形象一落千丈，香港已无立足之地。不过唔紧要，神州地大物博，思琦妹转向内地发展做直播，一样搵到两餐，养活自己同埋一对宝贝仔女。

思琦妹都好勤力，几乎晚晚见佢开Live。点知有网民踢爆，思琦妹曾开通付费聊天服务，限时5分钟单独聊天，索价1,200蚊人仔！嗱，值唔值见仁见智，但内地网民就唔多Buy，闹佢收得太贵，好黑心喎。

哗，用到黑心嚟形容，似乎有啲夸张，但思琦妹贵为港姐冠军，又曾经系当家花旦，沦落到要收费同人私聊，又真系失格咗啲！唔少网民睇唔过眼，认为思琦妹连私聊都捞，不如搭路返娘家TVB，仲话如果佢同鼎爷搭档做《鼎爷厨房》，够晒噱头。哈，网民又真系几抵死，但以鼎爷的火爆个性，肯同“前新抱”做节目至奇。

即系咁，思琦妹虽然薄有名气，45岁生咗两个依然保养得宜，但喺内地做直播的反应只系一般，同大V冇得比，只系同一般网红差不多！搵食艰难，难怪要开通私聊服务增加收入。

讲真，收费私聊冇话对错，只要你情我愿咪得啰。只系思琦妹面皮薄，被人闹两闹，已关闭私聊功能。其实，女明星同粉丝私聊唔系重点，最令人想入非非嘅系，会唔会有其他下文！不时有女明星自爆被人问价，思琦妹又点可能冇Market呢！讲到尾，一个女人仔行走江湖并唔容易，唔知佢个隐形老公，几时先至会现身，帮手搵吓奶粉钱，减轻老婆负担？