娱圈单打：既然死𢱑冇用　不如搵第二春

王浩信同陈自瑶（Yoyo）的婚姻状况一向扑朔迷离。早排“Signal王”有剧出街，忽然主动提起老婆同个女，大收宣传之效。果然套剧一播完，呢位人夫即刻冇影。反观Yoyo绝口不提老公，只系最近播出的综艺节目《香港婚后事》，有感而发大谈婚姻观，认为另一半变咗心，“夹硬死𢱑都冇办法”，仲话若可重新再拣，会选择单身。咦，似乎有弦外之音喎。

之前Yoyo在同一节目已经爆料，话呢个世界上有好多女人“专向有妇之夫”埋手，网民即刻柯南上身，研究Yoyo讲紧边个。家阵又发表咁多灰爆言论，难道自揭婚姻状况冻过水？

讲真，一个女人婚姻幸唔幸福，真系有样睇，有爱情滋润，有老公爱锡，去到边都闪闪发光，好似陈豪同陈茵媺（Aimee）就系模范夫妻代表，Aimee真系去到边笑到边。之但系，呢几年不但冇人见过Yoyo同老公“合体”，每被问起老公，Yoyo唔系咿咿哦哦，就系语塞，惟有讲起个女同工作，先至会两眼放光。

好彩，上天总算公平，除咗赐予Yoyo一个乖乖女，最重要系事业渐入佳境。她首次担正的《婚后事》广获好评，证明绝对担得起女一资格。观众缘更系不断提升，外界都欣赏Yoyo事业凑女两兼顾。

点讲都好，Yoyo家阵先至42岁，冇理由继续Dry落去啫，唔想点样，可以点样？既然老婆开到口话另一半变咗心死𢱑都冇用，王浩信系咪应该有啲表示，积极啲证明自己冇变心呢？若不，系咪应该互相放生，男女都好，趁青春快快搵过第二春？