娱圈单打：跟风做职安汉子　最怕死性唔想改

继吴浩康转投“职安真汉子”成功洗底、建立顾家好男人新形象后，昔日同门、离婚界KOL张致恒（Steven）亦喜孜孜宣布考获地盘平安卡，打算做娱乐圈第二位职安真汉子咁话！之但系，网民始终唔睇好喎，点解呢？

即系咁，Steven如果肯洗心革面、正正经经打工养家，唔好搞到几个仔连奶粉尿片钱都冇，大家肯定会替他高兴，起码唔使隔三差五听到老婆雯雯炒虾拆蟹闹老公废柴，再唔系就伸大手板向网民“行乞”，烦不胜烦，落得耳根清净都系好事。但职安真汉子唔易做，日晒雨淋，担担抬抬，兼有一定危险性。Steven养尊处优，瞓觉多过食饭，呢啲粗重嘢是否做得来，谂都谂得到。

更现实的问题系，Steven挨得咩？连唱歌跳舞呢啲本应系佢专长的工作，佢都可以搞到被原公司、旧同僚唾弃，做地盘辛苦一百倍，佢点顶得住呀？恐怕就算有即pay地盘工介绍畀佢，佢唔使一日就打退堂鼓。再讲吖，第一个食螃蟹的人就话勇敢啫，第二个已冇乜意义。职安真汉子呢条桥已被吴浩康用咗，Steven跟风，一啲新鲜感都冇，不如考番个保安牌，做娱乐圈第一个大厦看更仲好啦，系咪咁讲先？

早前内地难得有人邀请Steven登台，据闻反应唔错，点知佢被爆唱一晚收七皮嘢，搞到债主要求速速还债，真系火头处处。老婆雯雯即时反击，否认有咁丰厚酬金之馀，仲反问外界点解唔可以畀条路老公行？唉，睇嚟呢两公婆仲未明白，唔畀条路佢行嘅并唔系别人，而系自己咋！