娱圈单打：宿敌新仇旧恨　易角有你冇我

吓，点会咁㗎！早前东网独家报道，视后张可颐相隔12年重返娘家无綫接拍重头剧《巨塔之后》，正当大家引颈以待之际，竟然传出张可颐辞演的消息！更震撼嘅系，顶上的人选，竟然就系当年合作《难兄难弟》而反目的宣萱！

唔通真系不是冤家不聚头？嗱，据闻剧中演员已经到咗佛山开工，新任女主角宣萱亦有现身开镜仪式！睇嚟件事都冇得掹咯，粉丝想再喺大台一睹张可颐的风采，惟有再等一会。

讲番呢两位花旦，二人差不多时期走红，《难兄难弟》一个扮陈宝珠，另一个扮萧芳芳，至今仍是电视剧经典。之但系，论外界评语，张可颐始终略胜一筹，皆因佢唔止外形神似陈宝珠，连说话腔调都学到十足十，宣萱则始终保持个人特色。另一方面，宣萱曾踢爆可颐拍剧经常迟到，搞到延迟煞科；可颐则反击系宣萱时常大笑引致NG！总之二人戏中系好姊妹，戏外有你冇我，《难兄难弟》电影版亦因此飞起宣萱，改由舒淇顶上。

两大女神一直面左左，直到可颐大病一场，停工养病期间学懂放下执着。2019年，宣萱主演舞台剧《大辞职日》，两人于后台世纪合照，终于破冰！可颐事后都觉得好无谓，明明一句Sorry可以化解的事情，竟然搞到失控，只能讲句年少气盛唔识谂啦。

好啦，世纪恩怨好不容易平息，殊不知可颐今番重回娘家拍剧又添波折，而易角对象又系宣萱！究竟可颐因乜事辞演仲系一个谜，而咁啱得咁跷，两位女神先后为友台拍剧，收视一样滑铁卢。睇嚟咁多年过去，佢哋始终有一份不解之缘喎！