娱圈单打：实现财务自由　女王神仙生活

做女人做到畲诗曼咁，你话系咪最高境界呢？嗱，呢位三届视后，事业有几成功唔使讲，就讲佢远远未到退休年龄，已经实现财务自由，呢个世界有几多女人做到？阿畲最近亮相好友社交平台频道，分享人生中最有价值的名牌收藏品，讲到每个女人都趋之若鹜的名牌包包，阿畲坦言冇包想买，因为乜都买过晒！

当袁靓靓仍然为H字头包包而疯狂，一众女星以在家堆积名牌包装盒圣诞树为荣，阿畲就无欲无求，仲觉得Shopping好嘥钱，好明显，佢嘅人生已经升华到另一阶段！不再盲目追求物质，真正了解自己所需，唔系个个女人做到㗎！当然啦，阿畲本身已经系名牌，又使乜花大钱追求名牌包包吖！

之但系，阿畲唔锺意Shopping啫，对于点样投资、点样钱搵钱，佢就十分有兴趣，仲好有眼光添！例如佢早年购入两条金条，只因Number靓，家阵金价狂升，一讲起佢就笑；又如买砖头，阿畲至今起码有5层楼揸手，今年初又以亲人转让形式，豪掷3,000万元将北角“维港颂”三房单位转至自己名下。保守估计，视后单系投资砖头，身家已经超过一亿大元！

仲唔止，《新闻女王》令阿畲事业再创高峰，演出机会不断，广告商排住队抢用，外传呢一年的收入又高达一亿元！阿畲早就系圈中知名富婆，身家随时数以亿计，难怪鬼咁风骚，透露正准备搬屋，仲直认早就财务自由添！

当工作唔使为钱而做，被动收入足以让自己过富足生活，做女人做到咁，唔止系人生胜利组，直情系人生神仙组啦！