娛圈單打:同係偷食唔同命 一個力保一個雪
2024年07月18日 00:04
東網電視
更多新聞短片
緋聞沸沸揚揚傳咗老半日,丘亞葵同龍婷呢對緋聞男女終於諗到點解畫。除咗男方主動劃清界線,揚言大家只係朋友Hello Kiss,女方亦獲TVB力撐,聲稱二人並無親密舉動,只係相片拍攝角度問題啫。喂,你信唔信呀?
嗱,網民顯然唔收貨。有網民話:「TVB係咪當觀眾傻?」又有網民留言:「淨係聽過Hello Kitty,冇聽過Hello Kiss」,更有網民戲稱為「何生何太2.0」!
老實講,兩個夾埋過百歲,男歡女愛又有乜嘢出奇,只係男方已婚,龍婷形象或多或少受損。之但係,小龍女真係好叻女。佢本身係瀋陽人,移居香港後在旺角街頭賣唱,因為唱腔激似鄧麗君,嬌聲嗲氣又夠圓滑,好快闖出名堂。其後參加央視《星光大道》獲2019年度總冠軍,仲登上央視春晚,威過威士忌!之後再下一城挑戰《中年好聲音》,儘管三甲不入,但打響知名度,繼而舉行個人演唱會,財源滾滾。
佢仲好識做人,TVB高層生日人到禮到,經常笑面迎人,無怪乎今次爆出不倫緋聞,大台不但冇詐型,仲發聲明支持到底!同人唔同命,另一「中一生」曹敏寶就冇咁好彩嘞,佢同人夫梁浩銓驚傳撻着,即使雙方矢口否認,一樣雙雙被丟入雪櫃!所以呢,識做人好過識唱歌就係咁解!
按目前形勢,只要傳媒冇繼續爆料,呢段緋聞應該不了了之。之不過,龍婷被認定係犀利女人,甚至被網民質疑靠男人上位,肯定水洗不清。至於TVB盲撐愛將,把尺唔係一視同仁,公信力仲剩番幾多,你話呢?