娛圈單打:紅咗被斥變囂張 因住高峰即低谷
2024年07月19日 00:04
東網電視
更多新聞短片
係人紅是非多,定係紅咗即囂張?人氣韓劇《背著善宰跑》男主角邊佑錫一炮而紅,他日前來港會粉絲,獲大批善宰迷接機。不料此趟香港之行,竟然在南韓引發爭議,就連當地的人權委員會都話要調查,咩料呀?
話說邊佑錫從首爾仁川機場出發往香港,大陣仗保鏢陣容盡顯巨星風範,由於送機粉絲和拍攝記者太多,保鏢竟然用強光照射民眾阻止拍攝,更強行查驗乘客機票,邊佑錫則一臉從容進入禁區,引爆全國人民怒火!有乘客向人權委員會告狀,直指保鏢侵犯人權,人權委員會證實即將展開調查。
事情愈鬧愈大,經紀公司隨即道歉,但輿論繼續抨擊邊佑錫。皆因佢結束香港之行返韓,抵達機場後,因為又有大批粉絲接機,於是繞場一周跟粉絲打招呼,又行近粉絲堆聽粉絲唱歌,場面混亂,結果又被指摘阻住地球轉,質疑佢點解唔直接離開機場,加重機場人員負擔。
喂,睇嚟呢位新進男神做乜都錯!好明顯,因為保鏢「過度保護」引發輿論猛批,為免再被罵個狗血淋頭,邊佑錫回韓不敢怠慢,急急展現親民一面,諗唔到一樣被鬧!試想想,要是佢掂行掂過直接走人,會唔會又被罵為耍大牌呢?
之不過,當紅偶像去到邊都受到粉絲簇擁,乃係正常現象,就連頂流金秀賢,都冇話要保鏢「過度保護」、開燈「殘」人同查票,邊佑錫都算大支嘢!此舉係咪出於明星本意,真係你諗你。在此奉勸一句:珍惜羽毛。南韓娛樂圈競爭激烈,年過30的邊佑錫已算紅得遲,若然紅咗即刻飄上天,好容易撻番落地攤攤腰!