笑看天下:發展旅遊 但見瞎折騰-施友朋 評論員
2024年07月20日 00:04
東網電視
更多新聞短片
最近經常聽到的豪言壯語,老朽認為係港府要全力拚經濟,為市民謀多啲幸福;另一個就係「無處不旅遊」!為咗吸引更多旅客來港,政府確實挖空心思,扭盡六壬,譬如文化體育及旅遊局上月初展開「好客之道」運動,又搵影視紅星宣傳好客之道就係要走多一步,可惜接二連三出現巴士司機、酒店職員爆粗不雅形象!
此外,又見高官興高采烈到四川商討大熊貓來港安排,高官就話要發展「熊貓經濟學」!老朽就有啲疑惑,內地同胞斷估唔會為睇「國寶」而專程來港湊熱鬧吧?要睇都喺內地睇啦!而外國遊客又有幾多係為咗睇熊貓而專程來香港呢?
「熊貓經濟學」真係掂?咁講啦,熊貓點都好過港府早前推動夜經濟及18區日夜都繽紛,花費不貲於各區設置嘅「打卡」點,譬如於東九文化中心外設置嘅LED玫瑰花海,曾經因全白色而被譏為靈堂;又如於中環海濱舉行嘅「SummerFest中環夏誌」戶外活動,場內其中一個充氣展品「埃及吉薩金字塔」,被網民笑指似「遮屍體帳篷」,除咗大吉利是,更鬧出連串笑話,連議員都話廢。
其實,本報早就指出,與其搞咁多不知所謂嘅「打卡」點,不如謀拓南大嶼旅遊、發展一小時「外島生態圈」之類更實際,也更能吸引外國及內地旅客來港深度遊。事實上,應該做嘅高官又唔去做,呢,好似啟德郵輪碼頭,至今仍然一片荒蕪,難怪香港郵輪及遊艇業協會已經撤出香港,遷往新加坡。政府就話一直十分重視香港郵輪業發展,但講又有乜用吖,如果政府真係重視而又認真去發展,啟德郵輪碼頭內嘅店舖何以不是關燈就是落閘!正如旅遊業界感嘆:愈來愈少郵輪以香港作母港,訪港郵輪被新加坡「搶晒」!