娛圈單打:中年女星的共識 食小鮮肉係常識
2024年07月26日 00:03
東網電視
更多新聞短片
不經不覺,日劇女神綾瀨遙即將踏入「女人40一支花」之齡。日媒年初盛傳她與男神佐藤健即將結婚,但雙方各有各忙毫無交集,用行動證明係流料。之不過,女神咁索當然不愁寂寞,日媒踢爆28歲男團成員Jesse「人肉速遞」到訪女神香閨,直指二人撻着,睇嚟女神好識食喎!
不同以往「非事實不回應」的態度,今次綾瀨遙所屬事務所對緋聞不置可否,表示不會過問藝人私事;男方所屬公司則大方承認兩人關係良好。從兩間公司的反應觀之,緋聞唔似煲水,可信程度非常高!
二人前年合作電影邂逅,戲中有對打場面,身體接觸多咗,連帶心靈交流亦增加!雖然雙方年齡相差接近12歲,但Jesse細心溫柔,成功攻陷女神芳心!知情人士透露,呢對姊弟戀已去到同居階段,男方仲好願意分擔家務,令現實中也是「乾物女」的遙妹非常受落,雙方以結婚為前提交往。最新消息,係傳出遙妹推劇,唔通好事近?
所以呢,女尊男卑並唔係問題,最重要情投意合!尤其女性平均壽命較男性長,女人搵個小鮮肉共度下半生,其實更符合人類生理需要!喺呢方面,香港有王菲同謝霆鋒做代表;南韓演藝圈例子更多,例如天后級的崔智友、孔孝真、韓藝瑟。佢哋大過老公9至10歲,除咗友姐老公傳出偷食,其餘女神都同另一半好Sweet,況且友姐至今都冇離婚吖。
講真,一線女星要搵個門當戶對的男人並唔容易,亦冇必要為咗嫁入豪門而委屈自己,反正老娘搵落大把!試諗吓,小鮮肉唔止睇得又做得,仲聽話貼服,係咪爽歪歪先?