娛圈單打:完了吧如無意外 毒蟲影帝變爛泥
2024年07月28日 00:03
東網電視
更多新聞短片
「完了吧,如無意外!」係呀,將呢句歌詞送畀南韓史上第二年輕嘅青龍影帝劉亞仁,適合不過。佢舊年爆出吸毒濫藥醜聞,身敗名裂,本月24日終審判決,檢方以情節嚴重為由,要求法官判以4年監禁、罰款200萬韓圜及追繳154萬韓圜。判刑結果還未出爐,呢條友仔又被舉報性侵!喂呀,你真係唔使撈咯!
化名A先生嘅30多歲男子,聲稱本月14日早上6時至下午4時,身處龍山區的公寓睡覺,醒後驚覺被劉亞仁性侵,於是報警。消息指,涉案公寓係第三者住所,並非劉亞仁或A先生所有,事發時還有其他男子在場。警方現正調查劉亞仁當時是否再次使用毒品。換言之,好可能又係開毒P、High大咗而犯案。
呢啲咪叫死性不改、爛泥扶唔上壁囉!呢位年輕影帝因為吸毒而被萬人唾棄,工作全面中斷,殊不知單案都未有判決,佢竟然繼續沉淪!南韓本身係極之保守嘅社會,連一度捲入吸毒風波嘅知名男星李善均,多次驗毒均呈陰性,始終無法擺脫輿論狂轟,走上自殺絕路!劉亞仁斷到正一正依然不知悔改,擺明就係自暴自棄,唔想再撈。
至於其性取向一向係公開的秘密,未出事前,劉亞仁已毫不忌諱,經常上載跟同性密友嘅合照,只差在未公開出櫃咋。即係咁,今時今日同性戀冇乜大不了,之但係南韓社會風氣保守到近乎封建,據知劉亞仁早就因為性取向而備受壓力。
但點都好,你有壓力,我有壓力,壓力山大絕非吸毒和犯罪藉口。家陣講乜都係嘥氣,劉亞仁已經徹底玩完,洗定八月十五聽踎監都得嘞!