笑看天下:盛事迎劍擊運動隨想-施友朋 評論員
2024年07月31日 00:04
東網電視
更多新聞短片
今屆巴黎奧運會開幕不久,香港運動員即發光發亮,捷報喜訊一個接一個,又「劍后」又「劍神」為港爭光,全城嗨爆!老朽相信香港體育產業大有可為,父母必為子女的課外活動選報「劍擊」,而向來熱門的鋼琴、芭蕾舞、繪畫,大有可能退居二、三線!
這一點絕不出奇,香港人愛跟潮流,不是嗎?連一個班戟漢堡,只不過加咗楓糖,已叫港人為之瘋狂,你話一時間香港同時出現劍后、劍神,萬千寵愛集一身,有仔女嘅唔畀佢學劍擊博一博,點會心息吖?呢嗱!唐時有「古文運動」,五四時有「白話文運動」,如今香江處處推行盛事,來個「劍擊運動」,不亦宜乎?
港隊今屆奧運爭氣,據悉播放奧運比賽嘅商場人流增加,也延長開放時間至深夜,而有安裝電視播放賽事嘅食肆多咗顧客,有餐飲業人士預料奧運期間,餐飲業界生意額有望上升百分之十五至兩成。然而,整體而言,本港零售市道、飲食業仍然低迷,加上寫字樓供過於求,樓價插水,日前有兩間大行於業績期前夕唱淡收租股。老朽乃無產階級,對股市、樓市市道所知甚少;之但係,憑日常生活觀察,深感北上消費其勢不可擋,皆因老朽平時幫襯開嘅西餐廳、冰室,真係執完一間又一間。
有一間喺香港經營咗25年嘅連鎖扒房,據悉在港共19間門店會關閉9間,有業界指呢間扒房以年輕人和家庭客為主,依家佢哋趁假日到深圳「鋸扒」嘅性價比相對香港高;而且港人口味有變,導致肉食為主嘅西餐廳經營更困難。老朽所居住嘅北區,北上消費尤其熾熱,難怪幫襯開嘅冰室、茶餐廳相繼結業,搞到老朽好冇癮,反正食件蛋牛治、飲杯奶茶都要40元,買完報紙索性回家自己煮!