笑看天下:劏房改名 好阿Q啫-施友朋 評論員
2024年08月15日 00:04
東網電視
更多新聞短片
天文台今年於7月內共21天發出酷熱天氣警告。美國國家海洋及大氣總署周一發表每月報告,顯示今年7月係自1850年有紀錄以來,全球最炎熱的7月,較全球20世紀平均7月溫度攝氏15.8度,高出1.12度。
看來,全球「熱到爆炸」會係常態。有團體早前公布調查結果,發現天台屋、平台劏房最高室內氣溫達攝氏36.4度,比天文台錄得的平均最高攝氏30.2度,高逾6度,一般劏房則高逾4度。團體指所有住戶都因劏房、天台屋居所酷熱,全部處於「極端警戒級別」,曾出現中暑徵狀,例如氣喘、頭暈、抽筋等。
有論者指出,香港啲劏房居民只係熱到暈、焗到病,還不至於如日本今年7月,多地氣溫升至攝氏40度,單是東京一天都熱死11人,香港係福地喎,熱極頂多係中暑啫!論者或許只係戲謔。事實上,全球熱爆呢個現象絕不能小覷,有研究指出,歐洲去年近5萬人死於極端酷熱天氣。研究員搜集歐洲35個國家嘅氣溫和死亡率等資料,顯示歐洲暖化速度較全球其他地區迅速得多,引發山火、旱災及健康問題,醫生稱之為「沉默殺手」。
「沉默殺手」其實真係好得人驚,皆因熱死人確實觸目驚心!香港啲劏房雖然未曾發生熱死人事件,不過有團體關注劏房問題確係好事,並提出多項建議,冀取締劣質劏房,期望在2029年或以前取締。其實,「告別劏房」梗係愈快愈好,劏房嘅存在係香港呢個國際金融中心嘅羞恥!
有關團體又建議將劏房改叫共享房屋,冇錯,改咗名確係順耳好多,不過,唔通改咗名劏房就不存在?好阿Q啫!老朽認為應保存劏房呢個名,等當局如芒在背,毋忘為基層家庭早謀幸福快建公屋!