娛圈單打:爛泥扶極唔上壁 欠債出軌冇出息
2024年08月16日 00:04
東網電視
更多新聞短片
《中年好聲音》是非停不了!繼曹敏寶被雪、龍婷偷食人夫斷正、支嚳儀變成疑似是非精後,又一「中一生」中箭爆醜聞,今次主角係曾經傳出同曹敏寶撻着的梁浩銓!呢條友仔都算澩嫪,見親報都冇好嘢,家陣又被債主追債80萬元,仲話佢呃人返工唔出糧,真係衰格唔係扮喎!
嗱,有債主喺《中音》討論區撰長文數臭梁浩銓,指本身從事音響工程的梁,疑似呃人投資佢盤生意,金額達到80萬,仲呃人返Part Time唔出糧,曾多次追討不果,迫不得已惟有在網上公開追債!有關貼文仲話,苦主唔止一個,而係一班!嘩,梁生你真係好人有限!
唔係偏激呀,大家都知梁浩銓個底好花,參賽時已公開欠債經歷,自稱生意失敗欠下巨債,搞到父母都將佢掃地出門,以為咁樣可以塑造浪子回頭形象;殊不知比賽過後,旋即傳出同曹敏寶出軌,搞到大肚妻子離家出走,壞到冇朋友!家陣又嚟一鑊,想唔講句「爛泥扶唔上壁」都唔得!
梁浩銓都唔敢否認,直認欠債唔止80萬,但就推說係以前做錯事,目前已同債主協商盡力還債,仲話大肚老婆已返回身邊,雨過天青喎。
喂,唔係本欄睇死佢,而係有樣嘢叫死性不改,有啲惡習係點都改唔到!好似「離婚界KOL」張致恒咁吖,咪日日話自己會生性、發誓會搵錢養家,結果咪日日喺度胡混度日、老婆嗌離婚,梁浩銓唔好得幾多㗎咋,甚至有過之而無不及。做人唔老實,一味靠吹呃呃氹氹,連父母都唔認個仔,試問仲點可能喺娛樂圈立足?好彩曹敏寶斬纜斬得快,嘿嘿!