娛圈單打:職安又添真漢子 洗底兼搵奶粉錢
2024年08月20日 00:04
東網電視
更多新聞短片
阿Deep吳浩康初出道時走勢凌厲,更封為「Eason接班人」,不過後尾做錯事被雪藏,可幸佢冇自暴自棄,早前轉型做職安真漢子成功洗底,個唱門票更被秒殺,真係戥佢高興。
近日屢傳財困BOYZ成員Steven張致恒有樣學樣希望洗底兼搵奶粉錢,聲稱考獲平安卡落地盤開工賺錢養家,有工友於社交平台發文透露在開工時遇到佢,大讚Steven勤力、冇架子、冇脾氣,見到佢係好畀心機做嘢,同事都係讚不絕口咁話。
貼文曝光後,網民好似唔多受,畢竟Steven向來負評纏身,今次洗心革面,比大熊貓「盈盈」19歲生日前老來產下龍鳳胎機率更低,難怪網友都「溫提」呢位工友「有冇問你借錢」、「你試吓借幾皮畀佢」,仲善頌善禱「希望你唔會成為下一個苦主」。
Steven一時話返大陸登台搵真銀,一時話放下偶包做茶記,依家又話撈地盤,真係唔知佢邊句真,不過都係佢老婆雯雯講嘢最一貫,由始至終都寸老公係大食懶,明言「使唔使賣身養埋你?」論霸氣論「妻綱」,「河馬」都要行埋一邊,遲吓香港協辦全運會,都好應學吓巴黎奧運開幕式表彰女性,立像向雯雯致敬。
話時話,近排樓市有幾好,大家有眼睇,建築業界嗌晒救命,行政會議成員兼立法會議員林健鋒仲一哭二鬧哀求銀行唔好Call Loan,不幸中之大幸,好彩冇行埋第三步。不過唔緊要,發展局局長甯漢豪話「業界前景仍然亮麗」,有女中豪傑呢一句頂百句,冤有頭債有主,如有開工不足,Steven隨時上門問佢拎奶粉錢。