娱圈单打：中年饥渴获力捧　声梦纯情唔够玩

被TVB视为镇台之宝的《中年好声音》系列，好睇系好睇矣，殊不知表面励志，内里淫乱，唔系大搞婚外情，就系欠下周身街数；唔系教晓大家有Hello Kiss呢回事，就系食软饭勾三搭四，镬镬新鲜镬镬甘。有比较有伤害，一众《声梦传奇》的小花小草显得零舍青春纯情，偏偏节目冇得再玩，咩道理呀？

《声梦1》造就Gigi炎明熹大红，仲令同届的姚焯菲、锺柔美、Archie冼靖峰知名度大开，佢哋亦好努力专注音乐事业。都话少女心事总是诗，人不风流枉少年，Gigi都有透露恨拍拖，又有煲水绯闻传出，但强调事业为重；Archie同方皓玟惊传母子恋后，更自爆“偶像唔拍拖”伟论，系咪够晒自律先？

《声梦2》声势不及师兄师姐，但都不至于沦为滥交制造厂，理应比一班饥渴中年更值得一个力捧机会，可惜到家阵声都唔声吓，被TVB投闲置散，有冇搞错呀！

反观一班“中一生”、“中二生”，个个绯闻皆系深水炸弹级别，究竟系人一世物一世、人到中年食得唔好嘥？定系中年要开餐、有食唔食罪大恶极？观众都搞唔清楚咯。但唔理搞到几咁杰挞挞都好，TVB依然认为你值得拥有，好似龙婷咁，喺冷河湿吓只脚，话咁快上水继续出镜唱歌，好似冇事发生一般，唔到你唔服。

嚟紧仲有“中三生”排住队出场，唔知又会有咩嘢动地惊天爱恋事发生呢？既然连软饭王同人妻小四“起唔到头”都爆埋出嚟，TVB不如食住条水，搞番个“中年单身即地狱、裸身求爱好声音香港版”，咁咪仲有噱头！