娱圈单打：望见人仔即身痕　恨返大陆再掘金

台湾女星小S徐熙娣不嬲把口唔收，估唔到今时今日两岸矛盾激化，佢一样有嗰句讲嗰句。自从胞姊大S徐熙媛同大陆前夫汪小菲擘面离婚后，小S亦起码有两年未有踏足对岸工作，近日有大陆粉丝在其社交网留言，敲碗叫小S到大陆演出见吓Fans，获小S本尊亲回：“我想啊，但一直有酸民让我却步”，结果又引来台湾网民大骂忘本。

讲真吖，大陆娱乐圈发展蓬勃，出手阔绰，环顾成个亚洲，真系冇其他地方比得上。台湾艺人当然唔会嫌钱腥，近年纷纷北上掘金，好似林志玲、S.H.E的Ella、言承旭、罗志祥、林志颖等一线大牌，都系陆综常客。之不过，随着民进党政府长期执政，唔少台湾人对大陆抱有偏见，致使到大陆搵食的台星也被推到舆论风口浪尖，左右做人难。

好似零负评女神林依晨，最近就因为一句“我是成都人”而受尽千夫所指，连其母校恩师都要跟佢割席，认真夸张！更不必提，经常开口夹着脷的可爱教主杨丞琳，由“我是广东人”到“河南人爱骗人”，将两岸网民一齐焫㷫！所以啫，有时身为台湾人，讲乜都错，做乜都死。

嗱，据闻大S之所以搞到离婚，就系因为价值观同大陆土生土长的汪小菲南辕北辙。小S同家姐共同进退，呢两年唔返大陆，但姣婆始终守唔到寡，家阵又心痒难耐。相信佢开到口，好快就会有Job送上门，大陆粉丝唔使几耐就会见到佢啦。

都系嗰句啦，大家都系中国人，何必分到那么细！有钱搵钱，有工开工，咁咪Happy啰，何必乜都政治挂帅啫！