娱圈单打：唔啪唔知身体好　脱无方知时运高

视后唐诗咏离开TVB后终于有机会好好养生，日前被东网独家拍得她跟发哥周润发一齐练跑。最令人啧啧称奇嘅系，二人唔止系好跑友，发哥原来仲系啪骨高手！当街帮诗咏拉筋松骨，搞到视后初时面容扭曲，喂哇鬼叫，继而一身松晒，四万咁口！

高大威猛的发哥手法纯熟，三两下手势就搞掂娇小玲珑的诗咏，二人互动相映成趣！一行人跑完步后，诗咏更不介意在发哥面前除低香汗淋漓的衬衫，换上新衫，足见二人熟不拘礼，好感情令人羡慕！诗咏坦言，过去经常挨更抵夜拍剧，搞到身子极差，“脱无”后终于有时间做运动养生，即刻变得精神爽利！

话时话，发哥慈悲为怀，当然唔止为诗咏服务，同行的资深电影人方平亦有幸试到发哥的手势。发哥练跑多年，早就有一套独门秘技，跑得舒适，松得招积，话唔定可以考番个牌，正式成为啪骨师傅喎。

讲番诗咏，脱无后愈活愈精彩，除咗闲时同发哥约埋练跑，最爽系可以拣Job做，唔使好似以前咁，日夜颠倒挨到残晒。早前传出视后迁往北角过千呎海景豪宅，月租6万大元，足证名成利就，搵落大把。

生活无忧，人美心善的诗咏亦不时做慈善探访，再唔系就同家人旅行增进感情。人生去到呢个境界，衣食无忧，真正好极！唯一憾事，可能系仲未搵到真命天子。诗咏被网民推举为绝世好女友，佢亦直认过去系“恋爱脑”一枚，但人大咗，终于学识不能单方面付出，要跟另一半一同成长。一个条件咁好嘅女仔，点可能冇人要啫，话唔定好快就会传出脱单喜讯啦！