娱圈单打：帅哥竟然沦大叔　女神失修变女巫

“长腿Oppa”李敏镐行年37，有排未到个“老”字，偏偏近年身形横向发展，一张俊脸肥肿不分，沦为油腻大叔。佢日前出席电影首映礼，又被弹满面油光，纹路尽现，仲好厚粉吓。唉，当年靓绝天下无敌手的《继承者们》金叹，一去不复返咯。

点解会咁㗎？口痕友就话，恐怕系整容后遗症。What？乜Oppa整容咩？嗱，咸丰年前已有小道消息传出，李敏镐左耳之所以冇咗忽肉，乃系将耳仔软骨切下，用嚟做隆鼻手术，再加上瘦面针，韩流男神成形！

即系咁，Oppa有个比鬼佬更高挺的鼻子，的确系不争的事实，但铁粉反驳，你唔畀人哋天生丽质咩！再讲吖，南韩整容术被誉为亚洲四大邪术之一，意思即系非常高明，明星砸大钱整容，冇理由三十几岁就走晒样啫。所以啫，信者恒信，不信者恒不信，信不信由你。

明明系9亿少女的梦，家阵竟然连马东锡大叔都Keep得好过佢，真系发梦都谂唔到。都系嗰句啦，小整怡情，大整变形。后生时候骨胶原饱满，肌肤紧致，点整都Hold得住；一旦年纪大咗，皮肤松弛，僭建物随时摇摇欲坠。

呢，Oppa第一个承认的圈中女友朴敏英，一张精致脸蛋据闻就系整容医生的杰作，“金秘书”一角简直就系颜值高峰。殊不知近年被指五官开始塌陷，网民纷纷震惊于女神脸沦为巫婆脸，尤以《月水金火木土》、《和我老公结婚吧》两剧最为明显。李敏镐会唔会步前女友后尘？希望唔会啦，话唔埋只系冇剧开先至疏于维修啫，一有工开，好快又回复俊脸啦。