娱圈单打：虎毒不吃儿　禽兽搞个女

所谓虎毒不吃儿，但呢个世界有啲禽兽父母，就连自己嘅亲生骨肉都唔放过。呢，经典金曲《I Believe I Can Fly》主唱者、57岁著名R&B歌手R.Kelly，涉及多项性侵儿童罪被判入狱31年，家阵仲踎紧监，但衰嘢揭极都有，今次轮到亲女儿自爆惨遭毒手！

佢26岁女儿Buku Abi于最近播出的纪录片自爆系受害者，8、9岁已遭老窦性侵，但惊得滞唔敢同人讲，直到10岁先至向母亲和盘托出并报警。哼，点知美国警方以事隔太久为由，表明唔会拉人，令Buku Abi二度受创，简直岂有此理。

如果唔系数年前荷里活爆发浩浩荡荡的“#MeToo”浪潮，R.Kelly被揭过去30年来，利用名气引诱胁迫少女，甚至同女童发生性行为，相信呢条变态淫虫都唔会被收监。所以啫，部分香港人以为美国乜都好，系民主自由法治灯塔，其实咪一样污糟邋遢，藏污纳垢。

讲起呢个禽兽，锺意搞细路女早就成瘾，1994年27岁嗰阵，竟然够胆死娶未成年15岁女歌星Aaliyah做老婆，直到女方虚报年龄曝光，婚姻被宣告无效，几年后个女仔仲坠机死埋！有指早在女方12岁嗰阵，已被男方睇中兼嗒咗，你话唔系变态系乜吖？

一件污两件秽。R.Kelly曾为同样卷入娈童指控的流行天王Michael Jackson作曲，名曲《You Are Not Alone》就系由佢所作。唉，呢两位系就系好有音乐才华，可惜私生活一塌糊涂。R.Kelly连亲生女都搞，因住收尾几年呀。