娱圈单打：若要拉壮丁生仔　新疆排到天脚底

喂喂喂，呢几日娱乐圈忽然热闹，围绕女星生仔的消息层出不穷。好似吴谨言挺着巨肚拍戏，至今唔承认奉子成婚，当人傻嘅；又如星女郎张雨绮，遭前夫的前度踢爆搵人代孕，至今粒声唔出，似乎身有屎。不过本栏最关心嘅系，曾被选为全球最美女星的迪丽热巴，竟然传出未婚生仔嘅消息！

嗱，网红郭美美爆料，声称两位一线演员“还没领证但已经有小孩了”，直指主角系新疆女星及东北男星。由于热巴去年曾传出同内地男星黄景瑜挞着，而且曾暂停拍戏半年有多，而黄景瑜咁啱又系东北辽宁人，于是爆料一出，网民纷纷对号入座，话题随即冲上热搜！

之不过，在人人一部手机、随时随地上网的年代，当红女明星若然大肚，即使匿埋喺天脚底，肯定一样会被人影到。热巴虽然曾暂停拍剧，但依然穿梭于各大小场合，根本冇停过，要无声无息地生仔，有难度喎。

再讲，呢位网红郭美美并非别人，佢多年前以中国红十字会总经理身份行走江湖，仲喺网上不断炫富，中国红十字会由是卷入假慈善、真敛财争议，搞到要被整顿。咁仲唔止，郭美美其后两度涉及非法赌博、非法开设赌场指控而锒铛入狱。踎咗几年放番出嚟，又摇身变成网红招摇过市，令人不得不写个服字。

既然咁多前科，郭美美嘅爆料有冇可信性，谂都谂得到。热巴的工作室赶紧发声明否认，仲话要对造谣者提告，搞到郭美美即刻话唔系影射热巴。讲真，热巴若然要结婚生仔，等着雀屏中选的男人，肯定由新疆排到去广州，使乜咁鬼祟吖。