娱圈单打：德岛风光明媚　难敌索女福利

大台旅游节目《自驾德岛》首播，黎诺懿以自驾游形式带领郭珮文（Juliana）及陈懿德畅游四国德岛，吃喝玩乐当然唔少得，不过龙虾刺身，Sake牛油烧蚝全部都唔系重点，观众们成晚都系等两位索女浸温泉派福利，特别系Juliana心口开窿比坚尼，吸睛度爆灯。

Juliana天生“大骑楼”，初出道时被标签波大冇脑，男人老狗固然流晒口水，不少女性当正佢系邪花劲藐，可幸一路走来，只见佢默默耕耘，贯彻无添加傻更更性格、喜感十足天然呆，逐渐又挽回女观众欢心。

节目内Juliana化身“Ju博士”解释“世界3大漩涡”之称的鸣门漩涡成因，唔少网民都大赞Juliana呢次“讲好多嘢呀”，最过瘾系佢食食吓饭突然翻眼“师傅到”咁，真系令人笑爆嘴，难怪黎诺懿都大赞佢有综艺感，“将最真一面畀人睇，唔系装出来。”

虽然德德今次被抢晒镜，佢一啲都唔介意，仲自爆深明同“咪神”硬撞硬实死无生，事前努力减肥8磅“应战”，正所谓机会系留畀有准备嘅人，果然叻女。

讲番德德，伊人毕业于中大新闻及传理系，假假哋都算系文科生神科，有智慧、有美貌、有家底，本来已经系人生胜利组，难得佢无偶包、工作表现认真搏杀，睇佢同Juliana喺《福禄寿训练学院》扮人肉奖座，完全做到“襟闹烂做冇诈型”。

正如黎诺懿评价二人“一个系赛车跑味重，一个系电动车有实用性，型号唔同。”用字精准、见解独到，黎监制即系黎监制，并非浪得虚名，希望大台高层都收到，畀多啲机会两位靓女好好发挥。