娱圈单打：咁系型英帅靓正　定系乸型似大妈

正所谓，“Fat唇嘅嘢识条铁”。于是乎，大家睇见K-Pop天王G-Dragon，以一身C字名牌降临本城举行的时装骚之际，唔止万众瞩目，赞美之声更系此起彼落。甚么“用脸穿衣”呀、“时尚感满满”呀、“完成度好高”呀，直教人不敢相信眼睛！只能慨叹：这是否现代版《皇帝的新衣》呀？

GD在南韩出发往香港时，已经以包头大妈Look现身，霎眼睇，仲以为系屋企个印尼姐姐放假出街添。到了香港，继续“女装男着”风格，以品牌经典的俏丽粉红Tweed Jacket，内衬阿婆最爱嘅深色碎花Ruffle Blouse，再配以一头红发及五颜六色指甲油，韩式时尚达人完成！佢仲同高大威猛嘅发哥“集邮”Selfie，呜呀，好开心喎。

喂，尽管传媒畀面盛赞，但普罗网民心里心里有个谜：妈呀，咁叫做俊？边忽俊呀？网民就好似《皇帝的新衣》嘅诚实小孩，直指GD着到成个大妈咁，仲撞样关菊英！对比香港代表发哥，穿着合身又得体，显得青春又不失庄重，无论点样睇，呢啲先叫做Fat唇啰。

其实，GD锺意女装男着，都唔系第一日嘞。之但系，女装由剪裁到尺寸，始终唔系为男人而设，GD虽然个子不高，但一样予人衣不称身之感。究竟咁系时尚定系畸怪，诚实小孩心中有数。

话时话，GD退伍之后都算黑仔，卷入李善均吸毒案，多次遭警方传召验毒及问话，幸好多次验毒结果都呈阴性，还佢清白。新歌《POWER》亦已上架，短短5日已经接近2,000万点击率，获粉丝力撑为王者归来。