娱圈单打：播两集即收咗皮　被腰斩自己申请

美国前总统克林顿名句：“笨蛋，这是经济问题！”改少少就适用于TVB综艺节目《战场上》嘅制作团队啦，之唔系：“笨蛋，这是常识问题！”啰。节目宣传铺天盖地，系威系势，点知播出两集之嘛，即刻无声无息被腰斩，咪就系冇常识啰。

日前本栏都提过，《战场上》一味将俄罗斯描述为屠夫、侵略者，唔止政治不正确，仲系对俄乌战事前因后果欠缺认知嘅反映。结果不旋踵即赖嘢，节目遭建制团体围插，怒斥为偏颇，仲怀疑制作团队有既定政治立场，想帮煽动呢场战争嘅美国，以及被美国当枪使、大打代理人战争嘅乌克兰总统泽连斯基涂脂抹粉喎，连带主持人黎芷珊嘅社交网页都被负评灌爆。

呢啲咪就系冇常识啰，咁多题材唔拍，偏要拍啲吃力不讨好嘅嘢，仲以为自己好有Sense，点知冇人赞不特止，反而被闹爆。黎芷珊自己都话，对时事并不了解，咁又何必自暴其丑，学人“深度”探讨仍然打紧嘅仗呢？

TVB拿拿临搵新闻部连拍3集《特朗普重掌白宫》顶档，下周同样时间，则改播王祖蓝《一条麻甩在汕头》。《战场上》播两集即玩完，嘥钱嘥时间嘥心机，由拍板到拍摄再到出街，竟然冇人及早发现问题，依家草草收档，唔知有冇人要问责孭镬呢？

都系嗰句啦，TVB综艺向来主打一个食买玩，继续呢个宗旨咪皆大欢喜啰，做乜要自己申请畀人插？冇见识、冇常识、冇知识，真系冇必要出来献丑。计本栏话斋，不如将82台嘅《冲游泰国10》搬去81台播，起码有靓女邝玲玲养吓眼吖！