娱圈单打：千年一遇烂饮女　两杯落肚即嚟料

喂，叫得做“千年一遇美少女”，美若天仙就梗㗎啦，大家亦肯定会想像，呢位美少女唔止靓，仲会系温柔体贴，娇声嗲气。之不过，世事又岂能尽如人意吖。呢，日本“千年一遇美少女”桥本环奈，被踢爆为人臭档，仲沉迷杯中物，一饮大咗就搞职场欺凌，人设大崩坏！

25岁嘅桥本环奈，因为16岁嗰年组队在街头表演，被网民拍下照片放上网，美貌旋即造成轰动。网民纷纷惊为天人，大赞桥本系一千年仅有一人嘅美少女，“奇迹一张相”事件不断发酵，一夜成名。其后凭电影《银魂》、电视剧《我是大哥大》嘅出色表现赢尽赞誉，千年一遇美少女之名响遍全亚洲。

好啦，一个咁完美嘅人设，何以一夕崩坏？鬼咩，桥本人仔细细，偏偏极之烂饮，已到酗酒嘅程度，而且酒品极差，饮多两杯即刻嚟料，对经理人呼呼喝喝甚至郁手郁脚，已经系家常便饭。结果出道唔够10年，换咗8个经理人，部分人甚至患上焦虑症，你话呢位美少女几咁巴辣呀！咁仲唔止，佢仲试过饮酒食生蚝搞到上吐下泻，连伦敦首演舞台剧都失场，真系冇眼睇。

仲有传闻话，桥本非常白鸽眼，靴咁大个鼻，喺片场见高拜见低踩，搞到幕后人员怨声载道。奇就奇在经纪公司明知桥本烂啄啄，一样纵容唔制止。计本栏话斋，有咩咁奇吖，帮公司赚到钱，话之佢几臭四喎。

嗱，桥本臭档还臭档，对爱情又几专一。佢最近被狗仔队拍下跟男星中川大志深夜约会照，期间仲深情献吻。二人两年前已传出挞着，当时拒绝承认，估唔到两年后依然甜蜜。