娱圈单打：有性冇爱拒结婚　仔都生埋仍单身

51岁韩国青龙影帝郑雨盛，一直姿姿整整以黄金单身汉自居，点知十年唔发市，一发就唔止十年。当地最强狗仔队D社爆料，指他与小16岁索模文佳庇“搞出人命”，女方今年3月为男方诞下一子，点知郑雨盛疑似唔认数，女方气愤之下爆大镬！

现年35岁的文佳庇以一身健康古铜肤色、玲珑浮凸索爆身材行走南韩娱乐圈，点知近年销声匿迹，意想不到竟然匿埋生仔。二人2022年在聚会认识，一个系知名一线男星，另一个后生又热情奔放，结果姣婆遇着脂粉客，一挞即着。

之但系男人嘅嘢，逢场作戏，留精不留情就梗㗎啦。去年6月文小姐告知影帝怀孕，要求结婚，吓到影帝缩都缩唔切，双方断联，直到今年3月BB出世，郑雨盛验埋DNA，知道无从抵赖，先至勉为其难负起责任。但所谓负责任，都系只肯支付孩子赡养费，而唔系女方所希望嘅做人世。有指文小姐心情低落，完全冇为人母亲嘅喜悦，于是把心一横爆料。

嗱，郑雨盛嘅事务所好快就确认为事实，仲话影帝对BB来临大感欣喜，会同女方各自负起父母责任。言下之意，即系打死都唔结婚。大家都知，大韩民国出名封建兼老土，网民对于影帝之言一面倒负评，话佢搞大人哋个肚就撒手不管，BB一出世就冇健全家庭，好冇阴功；又闹佢出嚟玩又唔戴套，正贱男。

讲真，郑生都系犯咗天下男人都会犯嘅错啫，香港影坛大哥成龙作为过来人，肯定最明白。呢，网上开始出现洗白言论，话郑生已有一个拍拖多年嘅正印女友，暗指文小姐系心机女喎。