娱圈单打：白雪公主路人样　把口唔收食香肠

今时今日战争当道，现实血淋淋，究竟大家仲需唔需要童话故事呢？迪士尼真人版《白雪公主》即将上映，早前释出预告，本来以为万众期待，不料官方网站的Unlike数目，竟然比赞好数目多几十倍！呢铺迪士尼都好头痕。

过去迪士尼将动画真人化，皆取得不俗成绩，例如《美女与野兽》、《狮子王》、《阿拉丁》等，以致食髓知味，不断开拍真人版，可惜近年观众口味改变，票房均遭遇滑铁卢。好似刘亦菲主演嘅《花木兰》，上映撞正疫情，惨败都预咗，但早前嘅《小鱼仙》由选角开始已一致劣评。今次《白雪公主》未上映先负皮，恐怕票房凶多吉少。

有美国网民就话，难以明白迪士尼耗费3年时间、斥资2.09亿美元，将动画真人化，结果全是电脑特效，真人化意义何在？又话《白雪公主》唯一获赞之处，就系勇于开放评论区，没有关闭网民负评留言喎。

平情而论，睇过预告片，由人物造型到故事情节都非常忠于原著，之但系一如《小鱼仙》嘅教训，网民最不满意系白雪公主嘅选角。呢位公主始祖由拉丁裔女演员兼歌手Rachel Zegler饰演，廿几岁卜卜脆，够晒青春，迪士尼亦总算冇刻意选用非裔演员，算系一种进步。

最弊系白雪公主实在太过经典，喺世人嘅认知里，白雪公主唔止白雪咁白，仲鬼火咁靓。当皇后由甜美可人嘅《神奇女侠》Gal Gadot饰演，Rachel路人一般嘅颜值即时被比下去。何况呢位姐姐仔多次失言，包括诅咒特朗普支持者“永世不得安宁”，恐怕呢个先系电影负皮嘅真正死因！