娱圈单打：私藏淫片赖压力　病态娈童佗衰家

该煨咯！台湾艺人黄子佼沉迷儿童色情，终于身败名裂。佢早前因为《儿童及少年性剥削防制条例》罪成，被判有期徒刑8个月，判决书昨日曝光。警方调查期间揭发，佼佼私藏2,259条儿童色情影像档案，简直已经病态成瘾。点知佢向法庭自辩，话买片只为减压，并非专挑未成年影片，亦唔系条条片睇晒喎。

可怒也！呢啲系乜嘢求情理由呢？淫秽影片售价不便宜，儿童色情更系不法集团牟利噱头之一，绝对会大肆标榜，佼佼私藏逾二千条未成年人淫片，居然话唔系专登挑选，讲都冇人信。正正系佢呢挺人渣，先至会助长不法集团向儿童下毒手！难怪连法官都顶佢唔顺，反问点会认唔出系未成年人。言下之意，即系你咪当人傻啦。

嗱，娈童呢味嘢，系心瘾嚟，话系变态都唔过分。佼佼搞出呢坛苏州屎，真系咪使旨意洗白。佢家阵唔止个朵臭晒，圈中人同佢割席，所有工作中断，最惨系连累老婆同个女。老婆孟耿如本身都系艺人，如今搞到避世冇面见人，真系我见犹怜。个女仲要得两岁，正值最需要父母陪伴阶段。一旦有个监趸老窦，仲要衰埋呢啲咁唔见得光嘅嘢，你话第时个女仲点抬起头做人？将来再大个女啲，随时畀同学仔笑到面黄。

所以话啫，一失足成千古恨。佼佼由公认嘅最佳主持人，沦落为今日嘅娈童变态佬，一切都系自己攞嚟。尤其死唔认衰，乜都赖压力，摆明全无悔意。好心啦，你有压力，我有压力，压力山大并唔系为非作歹嘅理由。够胆做唔够胆认，累人累物累街坊，佢唔系谂住仲可以博翻身啩？