娱圈单打：男大搞上市王国　女搵佬帮手接Job

恭喜视帝安仔郭晋安！其胞姊创办并由安仔担任非执董嘅保健食品集团，日前喺港交所挂牌上市，多位圈中好友一齐出席敲钟仪式，威过威士忌。安仔扬言会逐步减少娱乐圈工作，花多点时间打理公司业务。

演而优则商，娱乐圈都有不少成功例子，安仔已届耳顺之年，不可能永久做小生，为人生下半场转换跑道亦无可厚非。何况仲有仔女要养，梗系搵得几多得几多啦。可能人逢喜事精神爽，安仔亦洗甩胶面恶名回春现身，可见要保持青春，心情靓靓先至系最重要。

与此同时，前妻“小丸子”欧倩怡亦冇闲着，继续为全面复出娱乐圈铺桥搭路。有传小丸子近日搵咗个靓佬做经理人，对方非常肉紧护花，由是惹起网民猜测二人关系匪浅！呢位新经理人，原来系HOY TV旅游节目主持、有“旅游达人”之称嘅袁学谦。他跟小丸子相识逾十年，咁啱欧倩怡最近亦为HOY TV主持健康资讯节目，因缘际会一拍即合。

话说袁学谦受访时频频为女方护航，指其性格直肠直肚，加上十几年冇做幕前工作，说话太真，先至惹起误会。小丸子有靓佬帮手挡驾及接Job，讲多错多嘅机会怕且可以大减啦啩。

嗱，一夜夫妻百夜恩，虽然郭欧二人各走各路，但相信大家都希望对方有好发展，毕竟大家系仔女嘅父母，唔睇僧面都要睇佛面，无谓要仔女做夹心人吖。安仔为人老练，大家不用为他担心，反而小丸子比较天真幼稚，睇佢成日开口夹着脷就知道啦，惟有祝福佢带眼识人，唔会遇人不淑呗！