娱圈单打：豪门入场券　要攞唔容易

走先喇，系咁先喇，下次再玩吖。估唔到今次走先喇，竟然就系Kayan9896（吴家忻）！话说佢同百亿富三代马桂烽拍拖一年左右，恋情宣告玩完，日前忽然在社交网发文直认分手。之前仲见佢成功融入男友家中，外界都以为佢叠埋心水嫁入豪门，殊不知天不从人愿，豪门梦碎！

嗱，消息一出，唔少网民大叫抵死！鬼咩，除咗一贯嘅憎人富贵厌人贫心态，更因为家忻为咗全情投入新恋情，当时高调同前男友林家熙（Locker）斩缆，仲同前东家、一手捧红佢嘅网台“试当真”不欢而散。网民都觉得佢去得太尽，过于绝情，唔止Locker伤心，就连好友Tyson Yoshi都取消追踪家忻IG，众叛亲离。家阵落得人财两失嘅结局，网民唔心凉就假。

所以话啫，豪门入场券唔易攞㗎，真系能够跻身豪门做新抱嘅女星，统统唔简单。不仅要年轻貌美，更要身家清白，同时要知书识礼。好似“百亿新抱”徐子淇吖，毕业于伦敦大学学院及伦敦政治经济学院，学历绝对见得人，入门前虽然系娱乐圈中人，但大方得体乖巧伶俐，又唔会过分高调，乖乖女形象十分迷人，终于获李家首肯，成功达阵。

唔系话家忻有咩唔好，之但系距离豪门新抱嘅标准，似乎仍有一定距离。简单啲讲句，家忻系典型港女，亲切有馀，贵气不足。家阵网民十分关注，冇咗百亿富三代及试当真光环，家忻单人匹马闯荡江湖，成绩唔知仲会唔会咁好呢？

唔紧要啦，青春就系本钱，家忻都系廿几岁女啫，大把前途，今次走先喇，咪下次再玩啰。