娱圈单打：心病还需心药医　挨残副偈又何必

内地新一代顶流花旦赵露思传出病重消息，吓煞两岸三地粉丝！网上忽然流传露思一脸病容瘫坐轮椅、由友人推入医院嘅照片，加上其社交平台离奇被封锁，疑似被噤声，益发显得事有蹊跷！病重消息迅即炸开了锅，其非人拍戏行程亦随之曝光，外界都担心小妮子年纪轻轻就挨残咗！

嗱，究竟内情系点，到家阵都未有官方定论，但露思爸爸就向粉丝报平安，指女儿目前正在休养，着大家不用担心，似乎病情并非外传嘅“神经系统疾病”咁严重。内媒就盛传露思患嘅系精神病，话佢有严重抑鬱症，噢，听到都令人心痛！

即系咁，露思系当红女演员，行程排得密麻麻就预咗，毕竟花无百日红，有得搵钱，梗系搵多啲。之不过，露思一年拍三套剧，中间又有其他商演，完全冇时间休息，因此挨病都唔出奇。希望佢好好休息，唔好咁搏杀啦。

话时话，小妮子呢一年都可谓是非缠身，既被指拍戏耍大牌，又被批整容唔肯认，体形则一日比一日消瘦，犹如纸片人一般，难得佢本尊仲嫌唔够瘦，想再减多几斤！真系为咗靓靓，衣带渐宽终不悔。

最近佢同《玫瑰的故事》男星彭冠英合作《恋人》，本来万众期待，如今忽然入厂，戏份补拍无期。查实，之前已传出露思对剧本不满，曾与剧组沟通不果，搞到非常焦虑。于是乎，黑粉言之凿凿话露思“适时”病倒，目的系要跟剧组顽抗！喂，又唔好咁多阴谋论！露思奄奄一息，我见犹怜，不过心病还需心药医，若然大家有矛盾，倒不如好好沟通，四四六六拆掂佢，唔好搞到抑鬱咁惨情吖！