娱圈单打：等极都系得个吉　不如离巢免混吉

踏入2025年不久即听到令人不舍嘅消息，多次传出离巢嘅视后李佳芯（Ali），最近被TVB官网除名，艺人名单之中已见唔到Ali芳名。佢亦喺除夕当日发文，扬言“以新的身份，期待下一个作品”，似乎“脱无”已成定局！

Ali离巢消息至今未获正式确认，之但系另一好戏之人、肥仔何远东则铁定同大台说再见。前阵子播毕嘅《异空感应》，其演出颇获好评；现正播放嘅《奔跑吧！勇敢的女人们》亦见到肥东出镜，估唔到脱无脱得咁突然。

现年40岁嘅何远东效力大台已经16年，凭《降魔的》的士司机一角崭露头角，可惜外形所限，事业发展平平。他近年的起心肝减肥，体形由肥变瘦，叫佢肥东已不适合，但瘦身后演出机会反而更少。他直认好耐冇拍剧，为咗生计到中小学教书，兼职教小朋友话剧；又自嘲似工人姐姐，无法融入TVB呢个大家庭。

冇计啦，连视后级嘅Ali都长年坐冷板櫈，其貌不扬嘅肥东更加惨情，似乎也不足为奇。星途呢回事，一命二运三风水，除咗要有外在条件同演技，亦好讲究有冇运，更讲求识唔识做人。大台贵为兵工厂，新人源源不绝，年轻貌美、靓仔帅哥、奇人异士前赴后继，根本不愁兵源，要是你唔识做人，唔肯擦高层鞋，就算几咁醉心演艺事业，都只能载浮载沉，被人晾在一旁。

不过，家阵网络平台兴起，艺人嘅演出机会其实多咗，能唔能够杀出血路，就要睇自己造化啦。Ali咁有观众缘，应该不愁机会，大不了嫁人去。然而肥东不再肥仔，定位有啲尴尬。