娱圈单打：港产片固然老化　荷里活不遑多让

香港电影金像奖第一轮投票现正展开，于是大家见到不少奇景，例如亿元票房猛片《九龙城寨之围城》，“龙卷风”古天乐退居男配，电影公司提名林峯角逐影帝；《盗月者》就仲夸张，索性将MIRROR 12子齐齐报名竞逐最佳男主角，一于有杀错、冇放过！

嗱，家阵仲系投票时期，谅你MIRROR就算有追星局长撑腰，也不可能12子齐齐获得提名，否则盏笑大人个口。至于林峯，其实都成45岁，影坛可能仍算初哥，但在电视圈早就经验老到。外界形容古仔退居二线成全林峯，系对港产片传承嘅表现。本栏只觉得，传承就谈唔上，交棒都系古老板本分啫。

再睇吓其他报名角逐影帝者，名字皆耳熟能详，例如刘青云、吴镇宇、郭富城，甚至成龙都赫然在内。个个五六七十路，想唔叹句港产片老化都唔得！

当然啦，老化点止港产片，就算系荷里活，孭到飞嘅，咪又系来来去去嗰几个名字！好似靓佬汤咁，年过六旬，仲不停翻炒自己廿零岁嘅成名作。除咗《壮志凌云》续集全球票房大收，佢嘅《职业特工队》系列更系长拍长有。观众由当年嘅小学鸡，睇到家阵仔大女大，佢老哥依然打不死，问你服未。

咁仲唔止，靓佬汤食髓知味，被爆计划开拍1990年代表作《雷霆壮志》续集。当年佢因为该片沟掂前妻妮歌洁曼，想不到事隔三十几年，佢仲想学人做赛车手，都可谓老当益壮！嗱，睇到中外两个荷里活都系老人当道，搵个似样啲又有叫座力嘅后生仔都冇，影视潮流落在南韩同中国内地，真系不足为奇了。