东网电视
更多新闻短片
踏入新一年，韩剧依然疲不能兴。原本备受期待嘅《鱿鱼游戏2》无法再掀热度，声势平平；更惨情系李敏镐及孔孝真主演、制作费高达500亿韩圜嘅《问问星星吧》，收视低见1.8%，低迷程度令人震惊。口痕友话，呢套剧已唔需要继续献世，腰斩罢啦！
大卡士、大制作反应奇差，反而小品制作却有啲惊喜。跟《问问星星吧》同期播放、由韩智敏及李浚赫主演嘅《我的完美秘书》，收视率由第3集开始突破10%，网上人气高企，而且一直保持强势，最高收视率达到11.4%，大出外界预期。
40岁嘅男主角李浚赫一炮而红，接下来有3部作品待播，同时不停收到演出提案。入行接近20年，过去多演剧情片，第一次担正演出爱情剧即大受欢迎，女观众睇到心心眼，更获赞为着西装最好睇嘅男人，真可谓迟来的春天！事实再次证明，爱情剧始终系韩剧嘅王道！
讲真，呢套剧只系典型高甜韩剧，剧情也是常见嘅“霸道总裁爱上我”，唯一新意，系霸总由女主角饰演，男主角饰演万能秘书。打个比喻，即系经典韩剧《金秘书为何那样》，金秘书由男人演出。
或者正正系呢点小新意，令观众产生趣味。毕竟桥唔怕旧，最紧要受。韩剧目标群以女性为主，只要剧情能够击中女性观众芳心，要弹出就轻而易举。总好过拍埋啲曲高和寡、懒有深度，实际上狗屁不通、九唔搭八嘅作品，好似孔刘、徐贤真主演嘅《一箱情缘》就令人失望透顶。今时今日空有大卡士并不足够，观众胃口早被养大，唔会轻易卖帐。
