东网电视
更多新闻短片
歌星方皓玟（小明）近日惹起健康亮红灯疑云，除咗体形消瘦面无半両肉，更因为与网民唇枪舌剑非常燥底，被质疑精神不稳。佢日前亮相《CHILL CLUB》颁奖礼记者会，索性自嘲领有“白卡”，但在白卡之中只算系“黑卡”级别，未到刘马车、龙心呢啲“闪卡”级数。好啦，识得自嘲，证明都几睇得开。
之所以惹来黑粉“网暴”，主因都系小明亮相TVB节目啫。小明就话，呢排亮相TVB较密，决定停一停休息吓，有合适节目再亮相喎。好似《CHILL CLUB》就系ViuTV嘅节目，反映小明都唔系完全唔接受网民批评。两面走嘅歌星唔止佢一个，网民又何必咬实唔放？
讲到尾，就系今时今日仍然有黄蓝之分，网民认为ViuTV系黄、TVB系蓝；而小明数年前曾在演唱会自言，喺黑暗中做人要有骨气，自此被网民认定系黄，获得黄人掌声。本栏就唔评断上述言论系咪意有所指，但今时今日已经系良政善治新时代，艺人食四方饭，无非都系想得到更多观众赏识，硬要分黄蓝，真系好唔化。若然某电视台真系黄得咁交关，你估仲有冇可能一直生存？
所以啫，好多嘢都系网民自己想当然。再讲，ViuTV嘅资源高度集中喺自家男团女团身上，外人要分杯羹并唔容易，若然背后冇大唱片公司力撑，单靠亮相一个电视台，搵食都几艰难。
正所谓，搵食啫，犯法呀？本栏就赞成歌星们打破成见，个个电视台都亮吓相。接触更多观众，将歌艺带畀更多人欣赏，根本系歌星应有之义，何错之有？
