东网电视
更多新闻短片
南韩“坏咗嘅男神”金秀贤近排真系衰到贴地，自从金赛纶事件后，佢嘅形象断崖式崩盘，各个代言同佢划清界线，连原本预计本月30日参加嘅台湾“高雄樱花季”活动都随时冻过水。
虽然主办单位一再强调“计划不变，照常进行”，但网民就唔卖帐，留言“佢仲敢嚟？”、“不如连黄子佼一齐邀请埋啦”。据台媒报道，金秀贤呢次活动见面会酬劳就有40万美元，若果取消，恐怕要赔约13亿韩圜，金秀贤连一介女子7亿韩圜都穷追不舍，试问又点会舍得吖。
正所谓“一世人流流长，总会爱上几个人渣”，而南韩演艺圈渣男又特别多，性侵、吸毒、贿赂样样齐，根本唔系新闻。好似南韩影帝李炳宪就一向烂肉多朋友、卷入过唔少桃色风波，2014年佢被爆酒后乱性同大讲不文笑话，仲畀女团GLAM成员多熙勒索，难得危机处理得当，唔理真定假，佢老婆最后原谅咗佢，李炳宪大步槛过成功洗底，仲拍埋Netflix爆红剧集《鱿鱼游戏》添，唔到你唔服。
另一位影帝郑雨盛早前被爆出同35岁辣模文佳菲未婚诞子，正当大家等住落井下石时，郑雨盛反而大方承认，仲话“作为父亲，会承担起养育责任”，不知几咁Man！连老友李政宰都不离不弃，力撑佢话“呢啲系佢私事”、“相信郑雨盛本性不坏”，当堂起死回生，可见郑雨盛人缘都唔算差。
事到如今，金秀贤系唔系娈童已经系次要，反而“关公大灾难”至系致命伤，正如阿宝话斋“人类总要重复同样的错误”，睇住金秀贤不断死口唔认又不断畀人唧牙膏打脸，行径实在太过偷鸡摸狗，搞到信誉崩盘，即使最后事业彻底玩完，完全系咎由自取，唔抵可怜。
