东网电视
更多新闻短片
呢排日本艺能界都可谓歪风不止呀，日本天团SMAP队长中居正广性侵电视台女主播，搞到身败名裂，只能黯然收山；然后又到新一代男星上村谦信，涉嫌喺香港非礼女翻译员，件案到家阵都未审完。话口未完，又轮到曾参演《海角七号》嘅男歌手中孝介卷入“不同意性交罪”被捕。
话说44岁嘅中孝介，本月28日凌晨喺东京品川区一家公共澡堂内，涉嫌性侵一名20多岁男子。当时该男子浸完浴爽歪歪，不知不觉喺澡堂休息区椅子上瞓着，中孝介见状竟然食指大动，嚟一招霸王硬上弓，男子惊觉自己受到侵犯，立即将中孝介制服压住，随后由澡堂工作人员通报110报警，断到正一正。
唉，本栏尊重唔同人士有不同性取向，但真系唔明，点解要做犯法嘅事呢？忍一忍咁难咩？话晒都系公众地方，对方又三九唔识七，点可以见人赤条条就乱嚟㗎？好啦，家阵卷入官非，人格败坏，名誉扫地，真系唔知点收科咯。
嗱，其所属公司事发后发声明致歉，但就表明仍未联络得到中孝介。喂，知你冇面见人，但潜水都唔系办法。中孝介虽然星运一般，但曾演唱不少节目及动画歌曲，相信所有作品都要下架。港人最熟悉之作，当数2008年上映嘅台湾电影《海角七号》。
正所谓，色字头上一把刀，日本男星接连因为“色”字出事，讲到尾都系咎由自取。讲真，明星个个有名有利、有型有款，正正经经要几多囡囡或囝囝都有大把啦，使乜使用非法手段吖，正傻仔！所以话啫，明星未必有脑，一味心存侥幸，最终必然自陷绝路。
