东网电视
更多新闻短片
TVB新一档综艺节目《饮茶》已播出多集，请来家英哥伙拍两个后生女冯盈盈及关枫馨做主持，大谈广东饮茶文化兼介绍好嘢食。一老两嫩热热闹闹，观众反应正面，但见到盈盈着到靓一靓出镜，再睇吓家阵嘅热播剧冇一套有佢份，不禁令人疑问，唔通盈盈仍未走出雪柜？
嗱，大家一定记得，早两年忽然传出盈盈触怒无綫而被雪藏，剧集冇影，只能零星见佢参演游戏节目同做吓资讯节目主持。盈盈亦趁住冇工开重返校园，考取硕士资格，仲一度传佢转行添。可能有见盈盈转趋低调，知错能改，旧年终于传来解冻消息，盈盈亦发誓要为事业搏杀，唔会沟仔。
言犹在耳，观众依然冇乜喺幕前见到盈盈演出。翻查资料，佢对上一套担正嘅剧集《妳不是她》，已喺前年播毕，而最后一套剧集系一年前嘅《逆天奇案2》，并非女主角。换言之，即系成年冇剧开兼冇剧出街！
因乜解究咁惨情呀？睇吓刘颖镟、郭柏妍等小花，喺新剧抛胸露腿，迅即成为谈论焦点。论搏杀，盈盈一样好肯露啫，去年台庆一袭抛胸中空晚装，极尽性感。论演技，虽然盈盈冇乜，但亦唔见得其他小花做戏好叻，咁究竟问题出喺边处呀？
讲来讲去，唔通就系欠缺观众缘？以《饮茶》为例，网民大弹盈盈扮晒知性，作状到晕，好难顶喎，觉得关枫馨比佢自然讨好得多。唉，都话形象易毁难建，鬼叫盈盈初出道口没遮拦，吱吱喳喳大谈性经，加埋种种拜金传闻，家阵想走淑女路线，边有咁容易吖。既然观众唔受落，做吓节目主持，总好过完全冇曝光啦。
