东网电视
更多新闻短片
话咁快，声梦小天后炎明熹（Gigi）20岁女啦！生日前夕，Gigi去咗睇全城热爆嘅英国乐队Coldplay香港演唱会，回家之后深有感触，自爆无啦啦哭咗出来，唔止坐喺度哭，就连冲冲吓凉一样哭，真系我见犹怜！
因乜解究咁眼浅呀？Gigi都话唔知，究竟系睇完一场High爆嘅演唱会，回归平静不适应吖，定系踏入20岁不知所措，就留番粉丝慢慢琢磨。之但系，本栏就忽然有所联想，会唔会系眼前曾被形容为“翻版炎明熹”嘅Marf@Collar，获Coldplay钦点成为演唱会暖场嘉宾，喺台上发光发热，再睇吓自己惨遭雪藏，只能成为台下观众，因而感怀身世呢？
唔系本栏多心呀，而系两女现时发展对比实在太过鲜明。Gigi甫参加《声梦传奇》，即以16岁之龄夺冠，前途无可限量。TVB亦悉心栽培，机会源源不绝，拿下不少新人奖项，2023年仲开咗首个个人演唱会添。每次出席活动，Gigi梗有一行人护驾，又化妆又Set头又助手，待遇绝对系天后级别，羡煞其他同期出道嘅新人。
可惜吖，Gigi心比天高，希望有更广阔嘅发展空间，拒绝加签长约，结果即时遭到雪藏。唔止曝光率接近零，即使偶有活动，身旁护驾人员大减，就连娱乐新闻台都唔派人采访，简直系冰火两重天！
反观Marf，一直唔算系风头趸，出道初期仲因为同Gigi一样留齐荫发型，经常被人相提并论，而Gigi总会被睇高一线。点谂到风水轮流转，家阵轮到Marf平地一声雷，Gigi只能斯人独憔悴。
