东网电视
更多新闻短片
明年就系K-Pop天团Big Bang出道20周年嘅大日子，队长G-Dragon事先张扬，跟队友将有合体大计。系人都知，Big Bang由5子变成3子，全因另外两个队友唔生性。胜利唔使多讲，涉及9宗罪踎监一年半，个名臭过坑渠；T.O.P则衰队草，2017年被判罪成监禁10个月，缓刑两年。
好多V.I.P都关注，明年有冇机会见到Big Bang全员回归。即系咁，胜利烂蒲烂滚，所涉罪行严重，仲被外媒拍成纪录片，想重新归队，真系谂都唔使谂。早前胜利主动澄清，出狱后一直无意移民同经营夜场生意，讲到被人误解咁款，无非都系想试水温，但外界完全唔受落。
至于T.O.P同女练习生吸食大麻断正，涉毒艺人喺南韩一直难于翻身。虽然唔少外国V.I.P觉得，吸食大麻罪不至死，但毒品就系毒品。呢几年T.O.P都好努力洗底，原本谂住趁演出《鱿鱼游戏2》重新出发，点知套剧回响不如第一季，导演仲畀网民闹爆，点解要起用涉毒艺人。即使T.O.P表现得好有诚意，洗心革面，效果依然未如预期。
之不过，部分死忠V.I.P始终死心不息，成日都穿凿附会，话龙哥都好想T.O.P回归喎。例如最新公开《Home Sweet Home》MV，当中有太空人现身，跟4子最后合体歌曲《Still Life》MV，T.O.P穿上太空衣嘅造型不谋而合，被认定暗示4人必将合体。
是耶非耶？真系好视乎T.O.P今年嘅表现，睇吓国民肯唔肯再畀机会佢！毕竟Never Say Never！
