徐小鳳自爆多情人

徐小鳳在電台節目中詳細講述入行經過，並提到小鳳名字的由來，她說：「當年屋企人係叫我阿毛，之後有個高人幫我改做鳳字。」因參加歌唱比賽入行的小鳳姐坦言當年簽約唱片公司後未被力捧，有三、四年時間在等機會，她說：「嗰三幾年時間唔知做緊咩，冇晒心機，不過人就真係唔可以咁易放棄，我會記住當年支持同拒絕我o既人。」

小鳳姐承認當年受不少引誘，她說：「我曾經許下諾言到今日做到咗，就係我唔會學壞，我唔知咩叫壞，其實一個人好與壞，自己本身好大責任，唔好去賴人，有啲嘢係經唔起引誘。（有冇受引誘？）當然有。（點應付？）目不斜視，我當年唱夜總會，唔好令人有誤會。」主持人提及小鳳姐於1992年因舉行43場演唱會成功打破世界紀錄大全，小鳳姐說：「當年好好彩冇乜傷風，加上平時係夜總會唱成七小時。」

小鳳姐亦提到已故歌手梅艷芳，她說：「佢當年參加比賽唱我首《風的季節》，我哋形象上完全唔一樣。（成為好友？）會，大家唔同唱片公司，不過私下有聯絡，私下派對有共同朋友，有次佢打鼓伴我唱歌，年齡上當佢係妹妹，唱歌上大家不相伯仲。」對於梅姐逝世十周年，小鳳姐說：「時間好快，唔覺得離開咗我哋，非常可惜。」

將於下月十九日舉行紅館演唱會的小鳳姐被問到屆時是否穿婚紗？她笑說：「其實年年都係，只係唔同顏色。（未試過着婚紗？）試過係戲中客串着過。」主持人順勢問小鳳姐的感情事，小鳳姐說：「我從來未缺乏過冇人陪我。（情人嗰種？）都好多，人哋有冇情我唔理，但我好多情，日日都有。（好多追求者？）依家追求方式唔同，講明呀，口訊唔算數，唔好留口訊畀我，我係要聽同見到人。」問到當中有否揀到好對象？小鳳姐說：「冇諗過呢個問題。（係咪試過唔開心所以唔諗？）唔係，我唔係好想嘥人哋時間，我個心唔係到無謂嘥人時間。（心唔係到？）唔知點解，可能我比較注重幻想裡面，幻想人裡面包羅萬有，要似歌迷對我咁長情，係咪好難？對一個人要求咁高係好高難度，會好失望，自己都唔信自己係咪會咁長情，點諗人哋會咁長情。」