馬國明唔怕緋聞累冇真姻緣

馬國明下午出席賀年活動，希望新一年可以增加桃花運：「對娛樂圈嚟講係人緣，當然希望多啲觀眾支持自己。（愛情？）隨緣啦，我不嬲都唔強求嘅，（遇到好女仔？）其實遇到好多都好好，不過未係嗰樣嘢啫，TVB好多好女仔，你問我邊個都話好。」問到有否合眼緣，他直言冇乜時間了解，而且並非容易一見鍾情的人。

獲封「筍盤」的他又笑言TVB多「女筍盤」，問到傳緋聞的佘詩曼是否筍盤，馬明說：「阿佘梗係啦，佢好專業，但拍戲嗰幾日好忙，冇乜時間了解，希望可以再拍多啲。」他坦言渴望與更多女藝員合作：「冇理由拍死一、兩個，都驚觀眾嫌悶。（嫌楊怡悶？）唔係，係驚觀眾嫌啫，我拍嚟拍去都係楊怡、李詩韻。（想拍邊個？）鍾嘉欣、岑麗香都未拍過，總之未拍過嘅都想試下，拍劇要間中畀下新鮮感觀眾。」提到曾傳緋聞的朱千雪，問若再合作可會怕再傳緋聞，他謂：「同邊個拍都可以寫o架啦，緋聞我從來唔驚。（怕緋聞累冇真姻緣？）我又冇考慮呢樣嘢。（緋聞都係真嘅？）真嘅又點會呃到你哋呀，我又唔驚傳緋聞而唔同人合作，每個女藝人我都無任歡迎。」