梁家輝同Kelly伊健拍戲有壓力：跳到背脊濕晒　

影帝梁家輝（Tony）及陳慧琳（Kelly）接受有線節目訪問，二人大談拍攝新戲《盜馬記》期間的趣事。其中家輝大讚這是他遇過最有趣的電影：「呢部戲係我從影以來拍過最愉快、最輕鬆、最好玩嘅電影！好多謝導演帶我進入一個唔似電影嘅電影世界。」

星媽Kelly稱今次拍戲令她有回復單身的感覺：「屋企有老公打理，出國一個月可以全心投入拍戲，最開心係一拍完戲仲有時間去行街Shopping，好似回復單身生活咁。」但她好掛住兩個囝囝：「真係掛死我！其實頭一、兩個星期都有啲唔慣，我日日都會同佢哋傾電話同視頻。」

談到拍攝期間的小插曲，原來二人曾先後受傷，幸好並無大礙。Kelly說：「有場戲講我要從好高嘅岩壁上爬落來，然後要迅速解開攀石裝備同對手演戲，過程本來好流暢，我身上只掛住一個安全扣，點知去到中間個扣突然甩開，我就咁跌咗落嚟，個頭差啲撞落攝影機路軌。」

至於家輝則拍攝騎電單車戲時不慎弄斷肋骨，但不理醫生訓示休息三個月，第二日就開工，他表示全憑意志力「撐住」：「我唔想因為受傷而延誤成個拍攝進度，同埋我第二日覺得自己都冇咩事，所以主動向監製要求復工。但因為我太好動活潑，佢哋擔心我身體復原情況，仲刻意安排咗一位女製片喺我身邊，佢每日都會同我講『Tony！No Dancing！No Running！No Jumping！』」

談及反串扮女人，家輝笑言終於明白女人之苦：「真係好佩服女人，日日都要化妝、着高踭鞋，我着一着，雞眼、關節炎咩都出晒嚟！我今次真係犧牲好大，第一次拍攝主題曲時又跳又唱，Kelly同伊健都好勁，所以我要更加落力，着住西裝跳到背脊都濕晒！」