花弗杜浚斌小登科　冧掂老婆來港定居

新城電台主持杜浚斌（Ben）於九龍塘My Garden迎聚拍拖半年的圈外女友Renee，好友范振鋒夫婦、葉文輝及新城台長朱明銳夫婦齊來到賀，手持利是的范振鋒笑說：「呢啲朋友，二十蚊得啦！」之後澄清封了大利是。

一對新人受訪時不時打情罵俏，Ben透露認識老婆一年，但半年前才開始拍拖：「佢喺美國返香港玩時朋友介紹認識，之後我飛過去搵佢就撻着咗，雖然拍咗幾個月，但我都成37歲，都係時候結婚。」Ben望住老婆說：「簡直係個悲劇，我指你（老婆）。（閃婚？）點為之閃婚？」而Renee則大讚老公是Mr. Right。

問是否奉子成婚？Ben流晒口水說：「我都想，不過佢想過一、兩年二人世界先。」由於Ben給人感覺花弗，他笑說：「我收心養性咗好多年。」Renee大方透露今年生日已33歲，會跟老公留港定居。