踢爆Kelly唔慳家　梁家輝向伊健傳授馭妻術

影星梁家輝及鄭伊健同以「煲呔」Look出席電影《盜馬記》首映禮，問到是否事前刻意夾造型時，家輝笑說：「唔駛夾，我哋兩個都係男神，我係上一代男神，伊健就係新一代男神！」伊健即接口說：「我係中一代男神啫，新一代畀啲韓國霸哂。」

稍後會跟家輝到台灣及星馬等地為電影宣傳的伊健，直言最希望能返回拍攝地即布拉格宣傳，因在當地拍攝時拍得很開心。問到在當地有否順道shopping大破慳囊時，家輝隨即踢爆，「Kelly（陳慧琳）多啲，我哋好慳家嘅，知慳識儉，我成家嚟哂，淨係個環境已經夠happy啦！唔駛買嘢，係Kelly唔慳家啫。（唔駛買嘢氹老婆？）駛乜冧老婆呀，都已經係老婆啦，我哋好Man係男神嚟！（但伊健仲係新婚冇耐？）我教訓過伊健，啲錢唔係用嚟買啲唔環保嘅嘢，係Kelly教而不善，唔駛辛苦搵錢先可以亂買嘢。」

問到家輝還有何「馭妻術」可以過兩招給伊健時，家輝說：「唔駛馭，女朋友先要馭，夫妻之間係要尊重，互相享受生活，總之應買得買。」認同家輝的伊健，表示跟老婆蒙嘉慧的感情不是跟物質掛勾，此時家輝即強調說：「我哋係男神喎，你估係普通男人咩！」